احجز مقعدك

- هااا يا هادي قولت لمدير المدرسة اللي قولتهولك ولا تحب اعيد من تاني ، ولا انت ناوي عيالنا تعليمهم يطلع اي كلام.

- بالراحة عليا يا شادية ، كل شئ هيتنفذ زي ما انتي عايزة وأكثر شوية ، بصل اصبري ، ربنا يجعلك من اسمي نصيب.

- ماشي يا هادي لما اشوف اخرتها معاك ، بس لو محصلش اللي قولتلك عليه وديني منا قاعدة لك في البيت. 
....

في الصباح يجلس المدير كعادته علي مكتبه وأمامه دفتر الإنصراف والحضور كل مدرس يأتي يوقع اسمه بإنصراف الأمس وحضور اليوم – اصل بيمشوا قبل الميعاد والمدير طبعاً حفاظاً علي نفسه عمره في حياته ما يمضي لحد ولا حتي سبت –

يأتي هادي وهو مدرس اللغة الإنجليزية للمرحلة الإبتدائية- ومع انه خريج فلسفة بس ازاي بقا مدرس انجلش اهو دا اللي عمرك ما هتقدر توصلة لتفسير- يجلس علي مكتب مجاور لمكتب المدير اصلة مكتب اسم النبي حارسة الوكيل اللي هو طبعاً مش هادي خالص يهرش في رأسة ويستطرد قائلاً .
...

  - يامدير انا بقترح اننا ننقل عيال سنة اوله بتوع العام القادم الفصل اللي تم ترميمة مرخراً ، زي ما حضرتك عارف ان كثافة فصل سنة اولة بتكون اكثر من اي مرحلة لانها الكمية بتاجي بخيرها والمفروض انها مستمرة إلي الصف الثالث الإبتدائي ولانك زي ما عارف اكثر انهم بينجحوا بنص القانون حتي لو مش كتب ولا كلمة يعني عدد كبير في نفس المرحلة تلات سنين.

ينظر المدير إلي هادي من تحت النظارة بتعجب قائلاً:
....

- غريباً يااخي مع ان الابلة عطية اللي يدوبك مخلصة مع المرحلة الإبتدائية اقترحت الإقتراح دا من تلات سنين وانت أول واحد اعترض عليها ، لأ وايه كمان عملت جبهه مجلس شعب وخليت الاغلبية توافق علي رأيك في عدم نقل فصلها مش بس الدور العلوي اللي لسه مترمم ، لأ دا انت رفضت انه يتحرك من مكانه اصلاً.
...

- ياحضرة المدير الفصل ايام الابلة عطية كانت حالته كويسة دلوقتي بعد المطر ما بوظت الادراج والقرضة اكلت سقفه اللي من جريد النخل اصبح لا يصلح تماماً.

يضحك المدير بسخرية من كلام الأستاذ هادي قائلاً:
.....

- دا انت كلامك كله في مصلحة التلميذ النهاردة يامستر هادي ، بس بردة احب افكرك ان الكلام اللي بتقوله دا حصل من أول يوم دخلت فيه الابلة عطية الفصل والعيال جزمهم غرقت بالمية وكان ناقص يدخلو الفصل بمركب وعشان السقف من جريد النخل القرضة لعلعت فيه وبنت فيه قلاع وحصون لدرجة انها كانت مزرعة نمل ابيض فوق راس التلاميذ ولما الابلة اشتكت ان القرضة بتنزل علي هدومهم وبتدخل شنطهم وتاكل الكتب محدش عبرها بكلمة وفضلت ياولاده مكملة في الفصل.
.....

- طيب ياحضرة المدير المفروض كنت اتصرفت ساعتها، ولا حضرتك مستني حد يعرفك شغلك.

- المشكلة يامستر هاني اني اي رأي بقوله كنت بتقف انت وشلتك وبتكسره بأي شكل وكان اخر اقتراح اننا نجمع تبرعات ونغير السقف بس انت وقفت وقلت ملناش دعوة دي حاجات تخص الادارة ودا مش شغلنا.
....

- ياحضرة هو فعلناً وبردة انا عند رأي انها مش مسئوليتنا واحب انبهك بس انك لو مش غيرت الفصل بتاع اولة وطلعت فوق في المكان النظيف والكراسي الآدمية أولياء الأمور قالوا انهم هيكتبوا شكوي دا غير انه لو حصل حاجة للتلاميذ في الفصل انت اللي هتشيل الليله لوحدك لاني انا ناوي في الاجتماع القادم امضي كل المدرسين بعدم دخول الفصل دا لانه بيسبب خطور علي ارواح التلاميذ والمدرسين.
....

- بقا كده يامستر هادي طيب والفصل اللي فوق واللي هو سنه رابعه نوديه فين ، يروح يتعلموا في الشارع مش كده .

- ابداً ياحضرة المدير وحلها بسيط اوي ...اوي.

المدير في تعجب ...!!

- ازاي ....!!! فهمني ...!!!
.....

- صلي ع النبي ياحضرة المدير المبجل مش مشكلة لما نضيف رابعة اول علي رابعة تاني وبدال الكثافة ما في كل فصل 35 مش مشكلة لما تبقي 70 ودا برده في مصلحة التلميذ وعشان نحافظ علي روحة وبكده يبقي ضربنا عصفورين بحجر واحد.

لم يجد المدير مفر سوي الإنصياع لكلام مستر هادي لأن عارف ديتها ولا الادارة هترضي تبني فصل جديد ولا حد هيرضي يتبرع لسقف فصل جديد آدامي.
......

عندما رجع مستر هادي للمنزل بشر مراته انه الموضوع تم وانه بنته اللي هتدخل اوله ابتدائي السنة الجاية هتتعلم في مكان نضيف وكراسي جديدة وكله تمام زي ما طلبتي ياحيااااتي. 
....

فرحت ابلة شادية وتهلل وجهها وسارعت في طلب آخر من زوجها مستر هادي.

- طيب بقا لازم نختار افضل معلمة فصل عشان تدي فصل بنتنا ومتنساش انه يبقي فصل لأبناء المدرسين بس عشان مستوايات بنتي تبقي زي الفل .

مستر هادي يردد في رضا تااام

- طلباتك أواااامر ياحياتي.

كل عام وانتم بخير

الساعة تدق السابعة معلنه بداية عام دراسي جديد في مدرسة ابتدائي بإحدي القري ، يجتمع بعض المدرسين في اجتماع خاص بهم لتقسيم الطلاب الذين سوف يأخذون الدروس الخصوصية عندهم.

- بصوا بقا ياجماعة القسمة لازم تكون بالحق والمستحق ، يعني مش عايزين شرح كتير في الفصل وإلا كده الطلبة ممكن تعرض عن الدروس الخصوصية بالمرة وياريت كمان يكون فيه توبيخ للعيل عشان يهتم بمذاكرة وياخد درس احسن له عشان مخه التخين ... يعني من الاخر العب علي اعصابة والبركة في المناهج الصعبة اللي وفرت علينا المجهود يعني اي تلميذ هنا لازم ياخد درس لو عايز بس ينجح .

وقف احد المدرسين وقال بس دول شوية عيال دوقة واهاليهم علي اد حالهم ازاي نضمن انهم ياخدوا عندنا دروس و يعطونا الفلوس.

-  ما هو دا عيب المدرس اللي يشتغل في منطقة نائية بس نعمل حظنا كده ، بس احب اطمنك من الناحية دي متقلقش انا عندي الطريقة اللي تخليه يدفع غصب عن عين اللي خلفوه.

- ازاي ...!

- بسيطة ياسيدي نقوله انه هيسقط ويعيد السنة وبكده يدفع ، او نسقطهم كذا سنة ... وكمان انا بلاحظ ان الطلبة بتشتري شيبسي وسندوتشات ودا اسمه تبذير، يعني ابوة مديه ياكل ومش مديه ياخد دروس ، دا حتي تبقي عيبة في حقة.

-  طيب بقا ياريت تقسيمة الطلبة تبقي بالعدل يعني مفيش مدرس يستحوذ علي العيال اللي معاهم فلوس ويسيب للباقي العيال الكوحيتي... لازم عدل ربنا يطبق بالحق والمستحق.

مدرس اخر قام ليكمل حوار زملائه...

- طيب فرضنا أن التلاميذ مش استجابوا لفكرة اننا ممكن نسقطهم وكبر دماغة وسقط مرة واتنين وطلع من المدرسة مش كده هنساهم انهم بيتسربوا من التعليم.

صدر صوت ضحكة عالية من إحدي المدرسين وجعل الكل ينظر اليه بإستغراب معللين سبب الضحك.

- ( صوت ضحكه يجلل المكان ) يااااريت دا يحصل ويتسربوا من التعليم ، دا احنا يبقي ادينا خدمة جليلة للبشرية.

الكل في استغراب ونظرات العيون تلاحقة مطالبة بالتفسير أكثر وأكثر.

- ياجماعة انتوا مستغربين ليه للي بقوله ، انا بتكلم جد مش بقول كلام هزلي ، انتوا مش ملاحظين قلة الايدي العاملة في المهن الحرفية برغم كثرة البشر عندنا في مصر. الكل عايز يتعلم ويبقي مهندس وضابط ودكتور و... و.... ، طيب بذمتكم لو كلنا بقينا متعلمين مين فينا اللي يسوق الحمير واصدر صوت ضحكة عالية جعلت الكل من حوله يفكر في كلامه.

جاء رد احداهم :-

- بس خلي بالك احنا منقدرش نسقط التلاميذ لانهم لو سقطوا احنا اللي هنروح فيها وهيقولو علينا مش بنشرح حاجة في الفصل وهنتحول تحقيق وسين وجيم وخصم من المرتب اللي مش بيكمل الاسبوع معانا.

- ياجماعة انا مش بقول اننا نسقطهم بس خلينا اذكياء شوية يعني في ناس حابة عيالها تكون كويسة وكمان معاهم فلوس فاحنا لازم ندرس الظروف الاجتماعية لكل تلميذ وياريت لما كل واحد يدخل الفصل يسأل التلميذ علي صنعة والدة ايه ويركز علي الطالب اللي والده شغال شغلانه بدخل فلوس. مش كده ولا ايه ياجدعان...

يسمع المدرسين صوت المدير يشتاط غيظاً وبصوت عال يسأل:-

- هما المدرسين معظمهم راحوا فين ...! فين ...!

يرد عامل المدرسة

- في فصل 1/1 ياحضرة المدير ، في اجتماع مغلق ويدوب طالع من عندهم بالشاي.

يهدئ المدير من ثورته وكأنه فهم الليلة بالكامل، ويهرول مسرعاً إليهم ويقرع الباب ويدخل مباشرة وبسؤال خبيث يسألهم :

- شربتوا الشاي ولا لسة ...! - وكانه يقول لهم فيها لخفيها – هااا.. وايه اخر الاخبار ..!

يرد احدي المدرسين ...

- ابداً ياسيادة المدير احنا بس كنا بتداول مع بعض النقاط الصعبة في المناهج.

المدير : وياتري مدرس العربي بيتدوال المناهج الصعبة مع مدرس الرياضيات والدرسات  ، وايه اللي لم الشامي ع المغربي...! ولا يكونش المواد عاملة كباري علي بعضها. ما تجيبوا من الأخر وقولولي في ايه بالظبط...؟

- يرد إحدي المدرسين : بصراحة يامدير احنا بنتدوال اننا نعمل فصول تقوية للطلبة الضعاف بأجر رمزي في المدرسة وكنا هنشاور حضرتك بس انت سبقتنا فأحنا عايزين رايك في كلامنا دا ايه ..!

- المدير : انتوا مش شايفين ان فصول التقوية مش جايبة همها اليومين دول ايه رايكم نفتح سنتر دروس خصوصية واتولي انا ادارتها ودا بزنس يأكل دهب وطبعاً مش هلاقي احسن منكم مدرسين كفائة.

حملق المدرسين كلاً منهم للآخر في تعجب وفي نفس واحد قالوا جميعاً :

- موافقين يامعلم ....! علي بركة الله ...!

-----------------------------

الكاتبة / صفاء العربي